Leyendo...
Estás aquí:  Portada  >  Más Actualidad  >  Artículo Actual

A Agadic destina 60.000 euros á mostra internacional de teatro de Ribadavia, que celebra a súa 31ª edición do 17 ao 26 de xullo

Por   /  24/06/2015 

    Imprimir       Email

image_gallery

 

 

A Axencia Galega das Industrias Culturais (Agadic) da Consellería de Cultura, Educación e Ordenación Universitaria destina 60.000 euros á celebración da 31ª edición da Mostra Internacional de Teatro (MIT) de Ribadavia, co que revalida a súa achega ao financiamento deste encontro, que se desenvolverá do 17 ao 26 de xullo na vila ourensá.

Así o recolle o convenio de colaboración asinado onte na Cidade da Cultura de Galicia, en Santiago de Compostela, entre o director da Agadic, Jacobo Sutil, e o alcalde de Ribadavia, José Ignacio Gómez, que consolida a MIT, Premio da Cultura Galega 2013 na modalidade de Artes Escénicas, como un dos eventos máis importantes do sistema teatral galego.

O texto rubricado fai referencia, ademais, á compoñente emblemática da Mostra de Ribadavia, pola especial transcendencia que tivo no inicio e posterior desenvolvemento do teatro profesional galego. “Nacida en 1973 da man da Asociación Cultural Abrente, a mostra foi adquirindo en cada edición unha maior envergadura ata se converter na cita de referencia para o conxunto dos profesionais e afeccionados do teatro galego, que poden acceder deste xeito, no seu ámbito máis próximo, a propostas de artistas escénicos de sona internacional, así como ás propostas galegas máis innovadoras”, segundo versa o contido do convenio.

O apoio á MIT por parte da Agadic súmase á convocatoria de subvencións a festivais escénicos e de música galegos, actualmente en fase de resolución, e a través da que se destinan 370.000 euros anuais para a celebración deste tipo de eventos, considerados estratéxicos para a difusión cultural e para a dinamización da industrias do sector.

Organizada polo Concello de Ribadavia e baixo a dirección artística de Roberto Pascual, a MIT 2015 desenvolverá durante 10 días un amplo programa de representacións teatrais baseado, nesta ocasión, na hibridación de linguaxes escénicas que se dá na creación contemporánea e na autoría dramática actual. A carteleira completa desta trixésimo primeira edición presentarase oficialmente este xoves 25 de xuño nun acto que terá lugar no Centro Cultural Marcos Valcárcel de Ourense.

    Imprimir       Email

También te recomendamos...

NoticiasValdeorras se integra en CreandoTuProvincia

Leer mas →