Leyendo...
Estás aquí:  Portada  >  Más Actualidad  >  Artículo Actual

Deputación e Concello de Ourense inician unha nova etapa presidida pola máxima cooperación institucional

Por   /  17/06/2015 

    Imprimir       Email

Jesús Vázquez e Manuel Baltar

 

Deputación de Ourense e Concello de Ourense iniciaron onte unha nova etapa presidida pola máxima cooperación, o diálogo e a colaboración institucional. Así concordaron en afirmalo na súa primeira reunión de traballo no Pazo Provincial Manuel Baltar e o novo alcalde da capital, Jesús Vázquez, na que analizaron temas sociais, de infraestruturas, medio ambiente, cultura, sostibilidade e fondos europeos.

O presidente do goberno provincial anunciou que se creará un comité permanente de cooperación entre ámbalas dúas institucións “para dinamizar e optimizar os proxectos de interese común para a capital e a provincia, porque ábrese unha nova dimensión política onde a colaboración debe ser máxima polo ben da cidadanía ourensá”.

Manuel Baltar explicou que nesta estratexia de cooperación cos concellos da provincia a capitalidade ten un peso específico “e por iso crearemos o comité de cooperación, que se reunirá aló menos unha vez ao mes para facer seguimento das políticas que imos poñer en marcha de maneira conxunta”. O dito comité estará integrado por dous deputados provinciais e dous concelleiros do equipo de goberno da capital e por dous técnicos de cada unha das institucións, que valorarán políticas dos ámbitos sociais, de infrestruturas, culturais, medioambiental, deportivas, etc. “Este xeito de traballar –en opinión de Manuel Baltar- terá especial incidencia nos primeiros días nas cuestións que afectan á estratexia de desenvolvemento urbano sostible que aprobará a Deputación, unha visión estratéxica de provincia coa vista posta nos fondos comunitarios para que teñan en conta os catro grandes proxectos nos que estamos a traballar: o Plan “Ourense, a provincia termal”; da creación da primeira Axencia Provincial da Enerxía e do Medio Ambiente en España; do Plan de Cometitividade para as Pemes da provincia cunha especial vocación cara á internacionalización das que teñen presenza nos mercados internacionais, e o proxecto de “Provincia Intelixente” e Administración Electrónica que ten en conta as novas canles de comunicación cidadá e que lle da o protagnismo que merece aos cidadáns da capital e da provincia de Ourense”.

Baltar confirmou que en canto se constitúa a corporación provincial “estarei encantado de facer a primeira visita institucional ao Concello de Ourense”, e dixo que Jesús Vázquez, nas súas primeiras horas como alcalde de Ourense, “xa deu sobradas mostras do seu compromiso co municipio, e mesmo onte tivemos ocasión de comparecer por un tema que afecta á cidade e á provincia por igual, e polo tanto esa palabra “Ourense”, que preside hoxe esta reunión, onte viviu un momento importante con esa cooperación institucional para que un proxecto deportivo tan sinalado como o do Club Ourense Baloncesto poida estar na vindeira tempada na elite do baloncesto europeo”.

Manuel Baltar rematou agradecendo a visita ao alcalde de Ourense e o seu compromiso, “agradecéndolle tamén que teña a ben inaugurar esta nova etapa de colaboración absoluta para ir na procura de intereses xerais coincidentes tanto da capital como da provincia”.

Pola súa banda, o alcalde de Ourense, Jesús Vázquez, salientou que “dende sempre tivemos claro que a cooperación e colaboración institucionais son imprescindibles”, e neste senso lamentou que a cidade quedase illada, en certa medida, pola falla de diálogo institucional”. O rexedor ourensán recalcou que a de hoxe na Deputación de Ourense foi a súa primeira visita institucional, “como non podía ser doutro xeito, pois a provincia necesita á cidade e a cidade precisa da provincia”, e agradeceu a súa presenza nas primeiras horas da súa toma de posesión do cargo de alcalde.

No tocante á reunión, Jesús Vázquez avanzou que se concretaron aspectos que redundarán en resultados que serán visibles a curto prazo. Como punto de partida, puxo énfase en dous temas iniciais que serán incrementados paulatinamente. Por unha banda, en materia de infraestruturas, a Deputación e o Concello colaborarán na intervencións nos accesos á zona termal, así como nos aparcadoiros destas zonas. “O fundamental é que quen nos visita, accedan en condicións dignas ás nosas ribeiras termais”, precisou Vázquez.

Tamén en materia de infraestruturas, o Concello solicitou á Deputación unha brigada medioambiental para acondicionar as zonas do perímetro rural de Ourense. De feito, o Concello realizará unha relación de actuacións prioritarias para actuar de xeito inmediato nas mesmas.

Por outra banda, en materia de cultura, os compromisos suscritos hoxe están no Festival de Cine e na Axenda única cultural, tal e como explicou Jesús Vázquez. No que respecta ao certame cinematográfico, acordouse a inclusión de novo da Deputación na organización do mesmo. Ambas institucións, Concello e Deputación, buscarán conxuntamente a implicación doutras administracións para este eido, fundamentalmente a Xunta de Galicia.

No que respecta á Axenda única cultural, foi outro dos compromisos electorais, tal e como lembrou Jesús Vázquez, “polo que na medida do posible trataremos de sacar adiante este proxecto para que sirva de referencia global da oferta cultural que se da en Ourense”.

    Imprimir       Email

También te recomendamos...

NoticiasValdeorras se integra en CreandoTuProvincia

Leer mas →