Leyendo...
Estás aquí:  Portada  >  Más Actualidad  >  Artículo Actual

O “Proxecto VAREGA” de xestión integral de residuos da Raia agrupa a Deputación de Ourense, 6 concellos da provincia e 5 de Portugal

Por   /  13/11/2015 

    Imprimir       Email

A Deputación de Ourense participa xunto a 6 concellos da provincia e 5 de Portugal nun proxecto de xestión integral de residuos da Raia.

  • O secretario xeral de Unións Agrarias, Roberto García, presentoulle hoxe a iniciativa a Manuel Baltar, quen confirmou que o goberno provincial “avala e cooperará con este importante proxecto europeo”
  • O obxectivo do denominado “Proxecto VAREGA” é a construción de dúas plantas, unha de compostaxe e outra de depuración natural, para mellorar a xestión dos residuos orgánicos xerados nas explotacións gandeiras intensivas
  • Os concellos que se beneficiarán desta actuación son: Bande, Calvos de Randín, Entrimo, Lobeira, Lobios e Muíños, e por parte de Portugal: Arcos de Valdevez, Melgaço, Montealegre, Ponte da Barca e Terras do Bouro
Roberto García e Manuel Baltar

Roberto García e Manuel Baltar

 

O presidente da Deputación de Ourense, Manuel Baltar, recibiu hoxe a visita do secretario xeral de Unións Agrarias, Roberto García, quen lle presentou un importante proxecto medioambiental europeo que se vai levar a cabo na Raia, entre a provincia de Ourense e Portugal, e que ten como obxectivo mellorar a xestión integral dos residuos desta ampla contorna. O presidente do goberno provincial confirmoulle a Roberto García “a máxima colaboración por parte da Deputación de Ourense para cooperar e avalar esta destacada iniciativa medioambiental europea que beneficiará aos concellos arraianos da provincia de Ourense e aos seus homólogos de Portugal, e por extensión contribuirá á mellora do medio ambiente nunha ampla zona da eurorrexión Galicia-Norte de Portugal”.

Pola súa banda, Roberto García agradeceu a Manuel Baltar que a Deputación de Ourense achegue a súa cooperación neste proxecto, denominado VAREGA, que ten como obxectivo a construción de dúas plantas, unha de compostaxe e outra de depuración natural, para mellorar a xestión dos residuos orgánicos xerados nas explotacións gandeiras intensivas.

Os concellos que se beneficiarán desta actuación son, por parte da provincia de Ourense: Bande, Calvos de Randín, Entrimo, Lobeira, Lobios e Muíños, e por parte de Portugal: Arcos de Valdevez, Melgaço, Montealegre, Ponte da Barca e Terras do Bouro, todos eles incluídos na reserva da biosfera ”Peneda-Geres-Baixa Limia-Serra do Xurés”.

Os socios colaboradores do proxecto, enmarcado no Programa Poctep de cooperación transfronteiriza España-Portugal, son por parte de España: Unións Agrarias-UPA, e a Facultade de Ciencias de Ourense (Universidade de Vigo) por medio do Departamento de Bioloxía Vexetal e Ciencia do Solo da Área de Edafoloxía e Química Agrícola, mentres que por Portugal os socios son a Universidade de Tras os Montes e a Confederación de Agricultores de Portugal (CAP).

Plan de traballo

O plan de traballo do proxecto inclúe, ademais da construción das dúas plantas de compostaxe e depuración natural, a construción dun sistema de humidais superficiais e a creación dun “banco virtual” de residuos gandeiros e compost, que permitirá aos produtores dar de alta seus residuos, e aos potenciais compradores coñecer os tipos de residuos e compost dispoñibles. Para potenciar esta rede virtual poñeranse en funcionamento Puntos de Información e Xestión en todos os municipios implicados no proxecto, que incluirán Puntos Verdes e Zonas de Almacenamento de Restos Vexetais.

O proxecto contempla tamén elaborar un Plan de Xestión de Residuos, que inclúe a recollida dos mesmos e o seu tratamento e elaboración de compost.

A orixe deste proxecto europeo nace da idea de mellorar a xestión dos residuos e de conseguir un produto final cunhas propiedades fertilizantes equilibradas e de alto valor engadido, para a súa posterior comercialización, procedentes da compostaxe de gallinácea e xurros de porcino, así como de restos de podas, limpezas de montes e de residuos orgánicos derivados das industrias agroalimentarias.

O plan financeiro do proxecto baséase en tres vías de ingreso: venta de compost; taxas aos produtores en función das cantidades xestionadas, e subvencións.

    Imprimir       Email

También te recomendamos...

NoticiasValdeorras se integra en CreandoTuProvincia

Leer mas →